ಸರಬರಾಜು ಸರಪಳಿ

ಸರಬರಾಜು ಮತ್ತು ಬೇಡಿಕೆ ಪರಿಕಲ್ಪನಾ ಸರಪಳಿಯಲ್ಲಿ ಜೋಡಿಸಲಾಗಿದೆ.

ಸರಬರಾಜು ಸರಪಳಿ, ಕೆಲವೊಮ್ಮೆ ಇದನ್ನು "ಪೂರೈಕೆ-ಸರಪಳಿ" ಎಂದು ಸಹ ಕರೆಯಲಾಗುತ್ತದೆ.ಇದು ಸಂಕೀರ್ಣವಾದ ಲಾಜಿಸ್ಟಿಕ್ಸ್ ವ್ಯವಸ್ಥೆಯಾಗಿದ್ದು ಕಚ್ಚಾ ವಸ್ತುಗಳನ್ನು ಅಂತಿಮ ಉತ್ಪನ್ನಗಳಾಗಿ ಪರಿವರ್ತಿಸುವ ಮತ್ತು ಅವುಗಳನ್ನು ಅಂತಿಮ ಗ್ರಾಹಕರಿಗೆ ವಿತರಿಸುವ ಸೌಲಭ್ಯಗಳನ್ನು ಒಳಗೊಂಡಿದೆ. ಪೂರೈಕೆ ಸರಪಳಿ ನಿರ್ವಹಣೆಯು ಸರಬರಾಜು ಸರಪಳಿಯೊಳಗಿನ ಸರಕುಗಳ ಹರಿವಿನೊಂದಿಗೆ ಅತ್ಯಂತ ಪರಿಣಾಮಕಾರಿ ರೀತಿಯಲ್ಲಿ ವ್ಯವಹರಿಸುತ್ತದೆ.

ಸರಬರಾಜು ಸರಪಳಿಯಲ್ಲಿನ ಪೂರೈಕೆದಾರರನ್ನು ಸಾಮಾನ್ಯವಾಗಿ "ಶ್ರೇಣಿ" ಯಿಂದ ಶ್ರೇಣೀಕರಿಸಲಾಗುತ್ತದೆ. ಮೊದಲ ಹಂತದ ಪೂರೈಕೆದಾರರು ನೇರವಾಗಿ ಗ್ರಾಹಕರಿಗೆ ಸರಬರಾಜು ಮಾಡುತ್ತಾರೆ. ಎರಡನೇ ಹಂತದ ಪೂರೈಕೆದಾರರು ಮೊದಲ ಹಂತಕ್ಕೆ ಸರಬರಾಜು ಮಾಡುತ್ತಾರೆ.

ಅವಲೋಕನ

ಸರಪಳಿಯು ವಾಸ್ತವವಾಗಿ ಸಂಕೀರ್ಣ ಮತ್ತು ಕ್ರಿಯಾತ್ಮಕವಾಗಿದೆ.

ಸರಬರಾಜು ಸರಪಳಿಯನ್ನು ಉತ್ಪಾದನೆ ಮತ್ತು ವಿತರಣಾ ಹಂತಗಳೆಂದು ಎರಡು ಹಂತಗಳಾಗಿ ವಿಂಗಡಿಸಬಹುದು. ಉತ್ಪಾದನಾ ಹಂತದಲ್ಲಿ, ಘಟಕಗಳು ಮತ್ತು ಅರೆ-ಸಿದ್ಧಪಡಿಸಿದ ಭಾಗಗಳನ್ನು ಉತ್ಪಾದನಾ ಕೇಂದ್ರಗಳಲ್ಲಿ ಉತ್ಪಾದಿಸಲಾಗುತ್ತದೆ. ವಿತರಣಾ ಹಂತವು ಕೇಂದ್ರ ಮತ್ತು ಪ್ರಾದೇಶಿಕ ವಿತರಣಾ ಕೇಂದ್ರಗಳನ್ನು ಒಳಗೊಂಡಿರುತ್ತದೆ. ಅದು ಅಂತಿಮ-ಗ್ರಾಹಕರಿಗೆ ಉತ್ಪನ್ನಗಳನ್ನು ಸಾಗಿಸುತ್ತದೆ.

ಸರಬರಾಜು ಸರಪಳಿಯಲ್ಲಿ ಎದುರಾಗುವ ಅನೇಕ ವಿನಿಮಯಗಳು ವಿವಿಧ ಸಂಸ್ಥೆಗಳ ನಡುವೆ ನಡೆಯುತ್ತವೆ. ಸಂಸ್ಥೆಗಳು ತಮ್ಮ ಆಸಕ್ತಿಯ ವಲಯದಲ್ಲಿ ತಮ್ಮ ಆದಾಯವನ್ನು ಹೆಚ್ಚಿಸಲು ಪ್ರಯತ್ನಿಸುತ್ತವೆ. ಇತ್ತೀಚಿಗೆ, ಉತ್ಪನ್ನ ಮತ್ತು ಸೇವಾ ಕೊಡುಗೆಗಳನ್ನು ಒದಗಿಸುವಲ್ಲಿ ಸಹಕರಿಸುವ ವ್ಯವಹಾರಗಳ ಸಡಿಲವಾಗಿ ಜೋಡಿಸಲಾದ ಸ್ವಯಂ-ಸಂಘಟಿಸುವ ಜಾಲವನ್ನು ವಿಸ್ತೃತ ಉದ್ಯಮ ಎಂದು ಕರೆಯಲಾಗುತ್ತದೆ.

ನೈತಿಕ ಅಭ್ಯಾಸಗಳನ್ನು ಪ್ರದರ್ಶಿಸುವ ಪ್ರಯತ್ನಗಳ ಭಾಗವಾಗಿ ಅನೇಕ ದೊಡ್ಡ ಸಂಸ್ಥೆಗಳು ಮತ್ತು ಜಾಗತಿಕ ಬ್ರ್ಯಾಂಡ್‌ಗಳು ತಮ್ಮ ಸಾಂಸ್ಥಿಕ ಸಂಸ್ಕೃತಿಗಳು ಮತ್ತು ನಿರ್ವಹಣಾ ವ್ಯವಸ್ಥೆಗಳಲ್ಲಿ ನೀತಿ ಸಂಹಿತೆಗಳು ಮತ್ತು ಮಾರ್ಗಸೂಚಿಗಳನ್ನು ಸಂಯೋಜಿಸುತ್ತಿವೆ. ೨೦೧೮ ರಲ್ಲಿ, ಲೊಯೊಲಾ ಯೂನಿವರ್ಸಿಟಿ ಚಿಕಾಗೋದ ಸರಬರಾಜು ಮತ್ತು ಮೌಲ್ಯ ಸರಪಳಿ ಕೇಂದ್ರವು ಸಮೀಕ್ಷೆಯೊಂದರಲ್ಲಿ ೫೩% ಪೂರೈಕೆ ಸರಪಳಿ ವೃತ್ತಿಪರರು ತಮ್ಮ ಸಂಸ್ಥೆಗೆ ನೈತಿಕತೆಯನ್ನು "ಅತ್ಯಂತ" ಮುಖ್ಯವೆಂದು ಪರಿಗಣಿಸಿದ್ದಾರೆ ಎಂದು ಕಂಡುಹಿಡಿದಿದೆ.

ವಿಂಗಡಣೆ

ಮಾರ್ಷಲ್ ಎಲ್. ಫಿಶರ್ (೧೯೭೭) ಒಂದು ಪ್ರಮುಖ ಲೇಖನದಲ್ಲಿ "ನಿಮ್ಮ ಉತ್ಪನ್ನಕ್ಕೆ ಸರಿಯಾದ ಸರಬರಾಜು ಸರಪಳಿ ಯಾವುದು?" ಎಂಬ ಪ್ರಶ್ನೆಯನ್ನು ಕೇಳುತ್ತಾರೆ. ಫಿಶರ್ ಹಾಗೇ ನೈಲರ್, ನೈಮ್ ಮತ್ತು ಬೆರ್ರಿ (೧೯೯೯) "ಕ್ರಿಯಾತ್ಮಕ" ಮತ್ತು "ಪರಿಣಾಮಕಾರಿ" ಸಂಯೋಜನೆ ಅಥವಾ "ಪ್ರತಿಕ್ರಿಯಾತ್ಮಕ" ಮತ್ತು "ನವೀನ" (ಹ್ಯಾರಿಸನ್ ಮತ್ತು ಗಾಡ್ಸೆಲ್) ಸಂಯೋಜನೆ ಎಂಬ ಸರಬರಾಜು ಸರಪಳಿಯ ಕಾರ್ಯತಂತ್ರದ ಎರಡು ಹೊಂದಾಣಿಕೆಯ ಗುಣಲಕ್ಷಣಗಳನ್ನು ಗುರಿತಿಸುತ್ತಾರೆ.

ಇತರರು "ನೇರ ಸರಬರಾಜು ಸರಪಳಿಗಳು", "ವಿಸ್ತರಿತ ಪೂರೈಕೆ ಸರಪಳಿಗಳು" ಮತ್ತು "ಅಂತಿಮ ಪೂರೈಕೆ ಸರಪಳಿಗಳು" ನಡುವೆ ವ್ಯತ್ಯಾಸವನ್ನು ಗುರುತಿಸಿ ಅವುಗಳ ಬಳಕೆಯಲ್ಲಿ:

• "ನೇರ" ಸರಬರಾಜು ಸರಪಳಿಯು ಕಂಪನಿ, ಪೂರೈಕೆದಾರರು ಮತ್ತು ಗ್ರಾಹಕರನ್ನು ಒಳಗೊಂಡಿರುತ್ತದೆ
• "ವಿಸ್ತೃತ" ಸರಬರಾಜು ಸರಪಳಿಯು ಪೂರೈಕೆದಾರರ ಪೂರೈಕೆದಾರರನ್ನು ಮತ್ತು ಗ್ರಾಹಕರ ಗ್ರಾಹಕರನ್ನು ಒಳಗೊಂಡಿರುತ್ತದೆ
• "ಅಂತಿಮ" ಸರಬರಾಜು ಸರಪಳಿಯು ಉತ್ಪನ್ನ ಅಥವಾ ಸೇವೆಯ ಪೂರೈಕೆಯಲ್ಲಿ ಒಳಗೊಂಡಿರುವ ಎಲ್ಲಾ ಸಂಸ್ಥೆಗಳನ್ನು ಒಳಗೊಂಡಿರುತ್ತದೆ.

ಪ್ರತಿಯೊಂದು ಸಂದರ್ಭದಲ್ಲಿ, ಮಾಹಿತಿ ಮತ್ತು ಹಣಕಾಸಿನ ಹರಿವು ಸರಪಳಿಯ ಭಾಗವಾಗಿದೆ ಹಾಗೆಯೇ ಉತ್ಪನ್ನ ಅಥವಾ ಸೇವೆಯಾಗಿದೆ. "ಗ್ರಾಹಕರ ಮತ್ತು ಮಾರಾಟಗಾರರ ಸಂಬಂಧಗಳು" (ಪ್ರತಿ ಹಂತದಲ್ಲಿ) ಮಾಹಿತಿಯ ಹರಿವಿನ ಜೊತೆಗೆ ಸರಬರಾಜು ಸರಪಳಿಯ ಮೂರನೇ ಮುಖ್ಯ ಅಂಶವಾಗಿದೆ ಎಂದು ಫಾಜೆಲ್ ಜರಾಂಡಿ ಮತ್ತು ಇತರರು ಹೇಳಿದ್ದಾರೆ.

ವೈಯಕ್ತಿಕ ಸರಬರಾಜು ಸರಪಳಿ ಹೊಂದಿರುವವರು ವಿಭಿನ್ನ ಪೂರೈಕೆ ಸರಪಳಿಗಳಲ್ಲಿ ವಿವಿಧ ಹಂತಗಳಲ್ಲಿ ಸ್ಥಾನ ಪಡೆದಿರುತ್ತಾರೆ. ಉದಾಹರಣೆಗೆ, ಬ್ಯಾಂಕ್ ಸರಬರಾಜು ಸರಪಳಿಗಳಲ್ಲಿ ಪೋಷಕ ಪಾತ್ರವನ್ನು ವಹಿಸುತ್ತದೆ. ಕೆಲವು ಸಂದರ್ಭದಲ್ಲಿ ಬ್ಯಾಂಕ್ ಭದ್ರತೆಗಾಗಿ ಸರಬರಾಜು ಸರಪಳಿಯಲ್ಲಿ ಗ್ರಾಹಕ ಅಥವಾ ಗ್ರಾಹಕರಿಗೆ ಹತ್ತಿರದ ಪೂರೈಕೆದಾರರಾಗಿ ಕಾರ್ಯನಿರ್ವಹಿಸುತ್ತದೆ. ಬ್ರೌನ್ ಮತ್ತು ಇತರರು ಸರಬರಾಜು ಸರಪಳಿಗಳನ್ನು "ಸಡಿಲವಾಗಿ ಜೋಡಿಸಲಾಗಿದೆ" ಅಥವಾ "ಬಿಗಿಯಾಗಿ ಜೋಡಿಸಲಾಗಿದೆ" ಎಂದು ಉಲ್ಲೇಖಿಸಿದ್ದಾರೆ: ಅತ್ಯಾಧುನಿಕ ಕಂಪನಿಗಳು ತಮ್ಮ ಬಿಗಿಯಾಗಿ ಜೋಡಿಸಲಾದ ಪ್ರಕ್ರಿಯೆಗಳನ್ನು ಸಡಿಲವಾಗಿ ಜೋಡಿಸಲಾದ ಪ್ರಕ್ರಿಯೆಗಳಾಗಿ ವಿನಿಮಯ ಮಾಡಿಕೊಳ್ಳುತ್ತಿವೆ. ಇದು ಕಂಪೆನಿಗಳಿಗೆ ಲಾಭದಾಯಕವಾಗಿಸುತ್ತದೆ.

ಈ ಕಲ್ಪನೆಗಳು ಸಹಯೋಗದ ಎರಡು ಧ್ರುವೀಯ ಮಾದರಿಗಳನ್ನು ಉಲ್ಲೇಖಿಸುತ್ತವೆ: ಬಿಗಿಯಾಗಿ ಜೋಡಿಸಲಾದ ಅಥವಾ "ಹಾರ್ಡ್-ವೈರ್ಡ್" ಇದನ್ನು "ಸಂಪರ್ಕ ಕೊಂಡಿ" ಎಂದೂ ಕರೆಯುತ್ತಾರೆ. ಇದು ಸರಪಳಿಯೊಳಗೆ ಖರೀದಿದಾರ ಮತ್ತು ಪೂರೈಕೆದಾರರ ನಡುವಿನ ನಿಕಟ ಸಂಬಂಧವನ್ನು ಪ್ರತಿನಿಧಿಸುತ್ತದೆ. ಸಡಿಲವಾಗಿ-ಜೋಡಿಸಿದ ಸಂಪರ್ಕ ಕೊಂಡಿ ಖರೀದಿದಾರ ಮತ್ತು ಮಾರಾಟಗಾರರ ನಡುವಿನ ಪರಸ್ಪರ ಅವಲಂಬನೆಯನ್ನು ಪ್ರತಿನಿಧಿಸುತ್ತದೆ. ಚಾರ್ಟರ್ಡ್ ಇನ್‌ಸ್ಟಿಟ್ಯೂಟ್ ಆಫ್ ಪ್ರೊಕ್ಯೂರ್‌ಮೆಂಟ್ & ಸಪ್ಲೈನ ವೃತ್ತಿಪರ ಮಾರ್ಗದರ್ಶನವು ಬಿಗಿಯಾಗಿ ಜೋಡಿಸಲಾದ ಸಂಬಂಧದ ಗುರಿಯು ದಾಸ್ತಾನುಗಳನ್ನು ಕಡಿಮೆ ಮಾಡುವುದು ಮತ್ತು ಸ್ಟಾಕ್-ಔಟ್‌ಗಳನ್ನು ತಪ್ಪಿಸುವುದಾಗಿದೆ ಎಂದು ಸೂಚಿಸುತ್ತದೆ.

ಮಾದರಿಗಳು

ಸರಬರಾಜು ಸರಪಳಿಯ ರೇಖಾಚಿತ್ರ. ಕಪ್ಪು ಬಾಣವು ವಸ್ತುಗಳು ಮತ್ತು ಮಾಹಿತಿಯ ಹರಿವನ್ನು ಪ್ರತಿನಿಧಿಸುತ್ತದೆ ಮತ್ತು ಬೂದು ಬಾಣವು ಮಾಹಿತಿ ಮತ್ತು ಬ್ಯಾಕ್‌ಹಾಲ್‌ಗಳ ಹರಿವನ್ನು ಪ್ರತಿನಿಧಿಸುತ್ತದೆ. ಅಂಶಗಳೆಂದರೆ (ಎ) ಆರಂಭಿಕ ಪೂರೈಕೆದಾರ (ಮಾರಾಟಗಾರ), (ಬಿ) ಪೂರೈಕೆದಾರ, (ಸಿ) ತಯಾರಕ (ಉತ್ಪಾದನೆ), (ಡಿ) ಗ್ರಾಹಕ ಮತ್ತು (ಇ) ಅಂತಿಮ ಗ್ರಾಹಕ.

ಸರಬರಾಜು ಸರಪಳಿ ನಿರ್ವಹಣೆಯ (ಎಸ್.ಸಿ.ಎಮ್) ಅಪ್‌ಸ್ಟ್ರೀಮ್ ಮತ್ತು ಡೌನ್‌ಸ್ಟ್ರೀಮ್ ಅಂಶಗಳನ್ನು ಪರಿಹರಿಸುವ ವಿವಿಧ ಸರಬರಾಜು ಸರಪಳಿ ಮಾದರಿಗಳಿವೆ. ಎಸ್.ಸಿ.ಒ.ಆರ್ (ಸರಬರಾಜು ಸರಪಳಿ ಕಾರ್ಯಾಚರಣೆಗಳ ಉಲ್ಲೇಖ) ಮಾದರಿ ಒಟ್ಟು ಸರಬರಾಜು ಸರಪಳಿಯ ಕಾರ್ಯಕ್ಷಮತೆಯನ್ನು ಅಳೆಯುತ್ತದೆ. ಇದು ಸರಬರಾಜು ಸರಪಳಿ ನಿರ್ವಹಣೆಗೆ ಒಂದು ಪ್ರಕ್ರಿಯೆಯ ಉಲ್ಲೇಖ ಮಾದರಿಯಾಗಿದ್ದು ಇದು "ಪೂರೈಕೆದಾರರ ಪೂರೈಕೆದಾರರಿಂದ ಗ್ರಾಹಕರ ಗ್ರಾಹಕರಿಗೆ" ವಿಸ್ತರಿಸುತ್ತದೆ. ಇದು ವಿತರಣೆ ಮತ್ತು ಸರಕುಗಳ ಪೂರೈಕೆಯನ್ನು ಪೂರೈಸುವ ಕಾರ್ಯಕ್ಷಮತೆ, ಉತ್ಪಾದನಾ ನಮ್ಯತೆ, ವಾರಂಟಿ ಮತ್ತು ರಿಟರ್ನ್ಸ್ ಪ್ರಕ್ರಿಯೆ ವೆಚ್ಚಗಳು, ದಾಸ್ತಾನು ಮತ್ತು ಆಸ್ತಿ ತಿರುವುಗಳು ಮತ್ತು ಸರಬರಾಜು ಸರಪಳಿಯ ಪರಿಣಾಮಕಾರಿ ಕಾರ್ಯಕ್ಷಮತೆಯನ್ನು ಮೌಲ್ಯಮಾಪನ ಮಾಡುವ ಇತರ ಅಂಶಗಳನ್ನು ಒಳಗೊಂಡಿದೆ.

ಸರಬರಾಜು ಸರಪಳಿಯನ್ನು ಸಾಮಾನ್ಯವಾಗಿ ವಿವಿಧ ವಿಭಾಗಗಳಾಗಿ ವಿಭಜಿಸಬಹುದು: ಕಚ್ಚಾ ವಸ್ತುಗಳ ಸಂಸ್ಕರಣೆ ಮತ್ತು ಉತ್ಪಾದನೆಯಂತಹ ಸರಬರಾಜು ಸರಪಳಿಯ ಹಿಂದಿನ ಹಂತಗಳು ಮಾರುಕಟ್ಟೆ ಬೆಲೆಗೆ ಹೋಲಿಸಿದರೆ ಉತ್ಪಾದನಾ ವೆಚ್ಚವನ್ನು ಪರಿಗಣಿಸಿ ಅವುಗಳ ಬ್ರೇಕ್-ಈವ್ ಪಾಯಿಂಟ್ ಅನ್ನು ನಿರ್ಧರಿಸುತ್ತವೆ. ಸಗಟು ಮತ್ತು ಚಿಲ್ಲರೆ ವ್ಯಾಪಾರದಂತಹ ಸರಬರಾಜು ಸರಪಳಿಯ ನಂತರದ ಹಂತಗಳು ಮಾರುಕಟ್ಟೆ ಬೆಲೆಗೆ ಸಂಬಂಧಿಸಿದಂತೆ ವಹಿವಾಟು ವೆಚ್ಚಗಳನ್ನು ಪರಿಗಣಿಸಿ ಅವುಗಳ ಬ್ರೇಕ್-ಈವ್ ಪಾಯಿಂಟ್ ಅನ್ನು ನಿರ್ಧರಿಸುತ್ತವೆ.

ಜಾಗತಿಕ ಸರಬರಾಜು ಸರಪಳಿ ವೇದಿಕೆ ಪರ್ಯಾಯ ಸರಬರಾಜು ಸರಪಳಿ ಮಾದರಿಯನ್ನು ಪರಿಚಯಿಸಿದೆ. ಈ ಚೌಕಟ್ಟನ್ನು ಎಂಟು ಪ್ರಮುಖ ವ್ಯವಹಾರ ಪ್ರಕ್ರಿಯೆಗಳ ಮೇಲೆ ನಿರ್ಮಿಸಲಾಗಿದೆ. ಅದು ಪರಸ್ಪರ ಕಾರ್ಯ ಮತ್ತು ಕ್ರಾಸ್-ಫರ್ಮ್ ಪ್ರಕೃತಿಯಲ್ಲಿದೆ. ಲಾಜಿಸ್ಟಿಕ್ಸ್, ಉತ್ಪಾದನೆ, ಖರೀದಿ, ಹಣಕಾಸು, ಮಾರ್ಕೆಟಿಂಗ್ ಮತ್ತು ಸಂಶೋಧನೆ ಹಾಗೂ ಅಭಿವೃದ್ಧಿಯ ಪ್ರತಿನಿಧಿಗಳನ್ನು ಒಳಗೊಂಡಂತೆ ಪ್ರತಿಯೊಂದು ಪ್ರಕ್ರಿಯೆಯನ್ನು ಪರಸ್ಪರ ಕಾರ್ಯ ಕ್ರಿಯಾತ್ಮಕ ತಂಡವು ನಿರ್ವಹಿಸುತ್ತದೆ.

ಅಮೇರಿಕನ್ ಉತ್ಪಾದಕತೆ ಮತ್ತು ಗುಣಮಟ್ಟ ಕೇಂದ್ರ (ಎಪಿಒಸಿ) ಪ್ರಕ್ರಿಯೆ ವರ್ಗೀಕರಣ ಫ್ರೇಮ್‌ವರ್ಕ್ (ಪಿಸಿಎಫ಼್) ಎಸ್‌ಎಮ್ ಒಂದು ಉನ್ನತ-ಮಟ್ಟದ, ಉದ್ಯಮ-ತಟಸ್ಥ ಉದ್ಯಮ ಪ್ರಕ್ರಿಯೆ ಮಾದರಿಯಾಗಿದ್ದು ಸಂಸ್ಥೆಗಳು ತಮ್ಮ ವ್ಯವಹಾರ ಪ್ರಕ್ರಿಯೆಗಳನ್ನು ಅಡ್ಡ-ಉದ್ಯಮದ ದೃಷ್ಟಿಕೋನದಿಂದ ನೋಡಲು ಅನುಮತಿಸುತ್ತದೆ.

ನಿರ್ವಹಣೆ

ಜರ್ಮನ್ ಕಾಗದದ ಕಾರ್ಖಾನೆಯಲ್ಲಿ ತನ್ನ ಕಚ್ಚಾ ವಸ್ತುವಾಗಿ ೭೫ ಟನ್‌ಗಳಷ್ಟು ಮರುಬಳಕೆ ಮಾಡಬಹುದಾದ ಕಾಗದವನ್ನು ದೈನಂದಿನ ಪೂರೈಕೆಯನ್ನು ಪಡೆಯುತ್ತದೆ.

೧೯೮೦ ರ ದಶಕದಲ್ಲಿ ಅಂತಿಮ ಬಳಕೆದಾರರಿಂದ ಮೂಲ ಪೂರೈಕೆದಾರರ ಮೂಲಕ ಪ್ರಮುಖ ವ್ಯವಹಾರ ಪ್ರಕ್ರಿಯೆಗಳನ್ನು ಸಂಯೋಜಿಸುವ ಅಗತ್ಯವನ್ನು ವ್ಯಕ್ತಪಡಿಸಲು ಸರಬರಾಜು ಸರಪಳಿ ನಿರ್ವಹಣೆ (ಎಸ್‌ಸಿಎಮ್) ಎಂಬ ಪದವನ್ನು ಅಭಿವೃದ್ಧಿಪಡಿಸಲಾಯಿತು. ಪೂರೈಕೆದಾರರೆಂದರೆ ಗ್ರಾಹಕರು ಮತ್ತು ಇತರ ಪಾಲುದಾರರಿಗೆ ಉತ್ಪನ್ನಗಳು, ಸೇವೆಗಳು ಮತ್ತು ಮಾಹಿತಿಯನ್ನು ಒದಗಿಸುವವರು. ಮಾರುಕಟ್ಟೆಯ ಬೇಡಿಕೆ, ವಿತರಣಾ ಸಾಮರ್ಥ್ಯ ಮತ್ತು ಉತ್ಪಾದನಾ ಸಾಮರ್ಥ್ಯಗಳ ಬಗ್ಗೆ ಮಾಹಿತಿಯನ್ನು ವಿನಿಮಯ ಮಾಡಿಕೊಳ್ಳುವ ಮೂಲಕ ಸಂಸ್ಥೆಗಳು ಮತ್ತು ನಿಗಮಗಳು ತಮ್ಮನ್ನು ಸರಬರಾಜು ಸರಪಳಿಯಲ್ಲಿ ತೊಡಗಿಸಿಕೊಳ್ಳುತ್ತವೆ ಎಂಬುದು ಎಸ್‌ಸಿಎಮ್ ಅವರ ಅಭಿಪ್ರಾಯ.

ವಿತರಣಾ ಸಾಮರ್ಥ್ಯ, ದಾಸ್ತಾನು ಮತ್ತು ಕಾರ್ಮಿಕ ಸೇರಿದಂತೆ ಕಡಿಮೆ ಸಂಪನ್ಮೂಲಗಳ ಬಳಕೆಯ ಮೂಲಕ ಗ್ರಾಹಕರ ಬೇಡಿಕೆಯನ್ನು ಪೂರೈಸುವುದು ಎಸ್‌ಸಿಎಮ್ ನ ಪ್ರಾಥಮಿಕ ಉದ್ದೇಶವಾಗಿದೆ.

೧೯೯೦ ರ ದಶಕದಿಂದ ಹಲವಾರು ಸಂಸ್ಥೆಗಳು ಮೂರನೇ-ಪಕ್ಷದ ಲಾಜಿಸ್ಟಿಕ್ಸ್ ಪೂರೈಕೆದಾರರೊಂದಿಗೆ (೩ಪಿಎಲ್) ಪಾಲುದಾರಿಕೆ ಮಾಡುವ ಮೂಲಕ ಸರಬರಾಜು ಸರಪಳಿ ನಿರ್ವಹಣೆಯ ಲಾಜಿಸ್ಟಿಕ್ಸ್ ಅಂಶವನ್ನು ಆಯ್ಕೆ ಮಾಡಿಕೊಂಡವು. ಆನ್‌ಲೈನ್ ವ್ಯಾಪ್ತಿ ಅಥವಾ ಸಂಪರ್ಕವಿಲ್ಲದ ಪ್ರದೇಶಗಳಲ್ಲಿ ವಾಸಿಸುವ ದಾಸ್ತಾನುಗಳ ಸಾಮಾನ್ಯ ಸಮಸ್ಯೆಯನ್ನು ಪರಿಹರಿಸುವ ಮೊಬೈಲ್ ಬಳಕೆಯಿಂದ ಆಫ್‌ಲೈನ್‌ನಲ್ಲಿ ಪ್ರಕ್ರಿಯೆಗೊಳ್ಳುವ ಕೆಲಸವನ್ನು ಕ್ಲೌಡ್ ತಂತ್ರಜ್ಞಾನಗಳು ಸುಗಮಗೊಳಿಸುತ್ತವೆ.

ಕಾರ್ಯವಿಧಾನ

ಎಸ್‌ಸಿಒಆರ್ ಮಾದರಿಯು ಸರಬರಾಜು ಸರಪಳಿ ಕಾರ್ಯಾಚರಣೆಗಳ ಕಾರ್ಯಕ್ಷಮತೆಯನ್ನು ಅಳೆಯುವ ೧೫೦ ಕ್ಕೂ ಹೆಚ್ಚು ಪ್ರಮುಖ ಸೂಚಕಗಳನ್ನು ಒಳಗೊಂಡಿದೆ. "ಸರಬರಾಜು ಸರಪಳಿಯ ಕಾರ್ಯಕ್ಷಮತೆಯನ್ನು ಅಳೆಯುವುದೊಂದು ಹೊಸ ಅಭ್ಯಾಸವಲ್ಲ. ಇಂದು ಹೆಚ್ಚಿನ ಸಂಸ್ಥೆಗಳು ತಮ್ಮ ಸರಬರಾಜು ಸರಪಳಿಯ ಕನಿಷ್ಠ ಕೆಲವು ಅಂಶಗಳನ್ನು ಅಳೆಯುತ್ತವೆ ಮತ್ತು ಹೆಚ್ಚು ಸಮಗ್ರ ಮಾಪನ ಕಾರ್ಯಕ್ರಮದ ಅಗತ್ಯವನ್ನು ಅರ್ಥಮಾಡಿಕೊಳ್ಳುತ್ತವೆ" ಎಂದು ಡೆಬ್ರಾ ಹಾಫ್ಮನ್ ಅವರು ಹೇಳಿದ್ದಾರೆ. ಹಾಫ್ಮನ್ ಅವರು ಸೂಚಿಸುವ ಉತ್ತಮವಾಗಿ ಕಾರ್ಯನಿರ್ವಹಿಸುವ ಪೂರೈಕೆ ಸರಪಳಿಯ ಮೂರು ಪ್ರಮುಖ ಸೂಚಕಗಳೆಂದರೆ:

• ಬೇಡಿಕೆಯ ಮುನ್ಸೂಚನೆಯ ನಿಖರತೆ: ಮುನ್ಸೂಚನೆಯ ಬೇಡಿಕೆ ಮತ್ತು ನಿಜವಾದ ಬೇಡಿಕೆಯ ನಡುವಿನ ವ್ಯತ್ಯಾಸವನ್ನು (ಯಾವುದಾದರೂ ವ್ಯತ್ಯಾಸ ಇದ್ದರೆ) ಉಲ್ಲೇಖಿಸುತ್ತದೆ.
• ಪರಿಪೂರ್ಣ ಆದೇಶದ ನೆರವೇರಿಕೆ: ಸಂಪೂರ್ಣ, ನಿಖರ, ಸಮಯಕ್ಕೆ ಮತ್ತು ಪರಿಪೂರ್ಣ ಸ್ಥಿತಿಯಲ್ಲಿರುವ ಆದೇಶಗಳು
• ಸರಬರಾಜು ಸರಪಳಿಯ ವೆಚ್ಚ, ಎಲ್ಲಾ ಮೂಲಗಳು, ಉತ್ಪಾದನೆ, ವಿತರಣೆ ಮತ್ತು ಗ್ರಾಹಕ ಸೇವಾ ವೆಚ್ಚಗಳನ್ನು ಸಂಯೋಜಿಸುತ್ತದೆ.

ಸ್ಥಿತಿಸ್ಥಾಪಕ

ಸರಬರಾಜು ಸರಪಳಿಯ ಸ್ಥಿತಿಸ್ಥಾಪಕತ್ವವೆಂದರೆ "ಬದಲಾವಣೆಯ ಮುಖಾಂತರ ಮುಂದುವರಿಯಲು, ಹೊಂದಿಕೊಳ್ಳಲು ಅಥವಾ ರೂಪಾಂತರಗೊಳ್ಳಲು ಸರಬರಾಜು ಸರಪಳಿಯ ಸಾಮರ್ಥ್ಯ". ಸರಬರಾಜು ಸರಪಳಿಯನ್ನು ಸಾಮಾಜಿಕ-ಪರಿಸರ ವ್ಯವಸ್ಥೆ ಮತ್ತು ಸಾಮಾಜಿಕ ಜನರ ಉಪಸ್ಥಿತಿ ಮತ್ತು ಅವರ ದೂರದೃಷ್ಟಿಯ ಸಾಮರ್ಥ್ಯ ಎಂದು ಅರ್ಥೈಸಲಾಗುತ್ತದೆ. ಸಾಮಾಜಿಕ-ಪರಿಸರ ವ್ಯವಸ್ಥೆ ಪರಿಸರ ವ್ಯವಸ್ಥೆಯಂತೆಯೇ (ಉದಾಹರಣೆಗೆ. ಅರಣ್ಯ) - ನಿರಂತರವಾಗಿ ಬಾಹ್ಯ ಪರಿಸರ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳಲು ಸಾಧ್ಯವಾಗುತ್ತದೆ. ಸಾಮಾಜಿಕ ಜನರ ಉಪಸ್ಥಿತಿ ಮತ್ತು ಅವರ ದೂರದೃಷ್ಟಿಯ ಸಾಮರ್ಥ್ಯದ ಮೂಲಕ ಮೂಲಭೂತವಾಗಿ ಹೊಸ ವ್ಯವಸ್ಥೆಗೆ ಸ್ವತಃ ರೂಪಾಂತರಗೊಳ್ಳುತ್ತದೆ.

ಸಾಮಾಜಿಕ ಜವಾಬ್ದಾರಿ

ಸಂಸ್ಥೆಗಳು ತಮ್ಮ ಉತ್ಪನ್ನಗಳು ಮತ್ತು ಪೂರೈಕೆದಾರರನ್ನು ಲೆಕ್ಕಪರಿಶೋಧನೆ ಮಾಡಬೇಕಾಗುತ್ತದೆ ಮತ್ತು ಪೂರೈಕೆದಾರ ಲೆಕ್ಕಪರಿಶೋಧನೆಯು ಮೊದಲ ಹಂತದ ಪೂರೈಕೆದಾರರೊಂದಿಗೆ (ಗ್ರಾಹಕರಿಗೆ ನೇರವಾಗಿ ಸರಬರಾಜು ಮಾಡುವವರು) ನೇರ ಸಂಬಂಧವನ್ನು ಮೀರಿ ಹೋಗಬೇಕೆಂದು ವೈಲ್ಯಾಂಡ್ ಮತ್ತು ಹ್ಯಾಂಡ್‌ಫೀಲ್ಡ್ (೨೦೧೩) ಅವರು ಹೇಳಿದ್ದಾರೆ. ಸರಬರಾಜು ಸರಪಳಿಗಳಲ್ಲಿ ಸಾಮಾಜಿಕ ಜವಾಬ್ದಾರಿಯನ್ನು ಯಶಸ್ವಿಯಾಗಿ ನಿರ್ವಹಿಸಲು ಸ್ಥಳೀಯ ಪಾಲುದಾರರೊಂದಿಗೆ, ಉದ್ಯಮ ಮತ್ತು ವಿಶ್ವವಿದ್ಯಾನಿಲಯಗಳ ಸಹಯೋಗವು ನಿರ್ಣಾಯಕವಾಗಿದೆ ಎಂದು ಅವರು ಹೇಳುತ್ತಾರೆ.

ಆಹಾರ ಸರಬರಾಜು ಸರಪಳಿಗಳು

ಅನೇಕ ಕೃಷಿ ಉದ್ಯಮಗಳು ಮತ್ತು ಆಹಾರ ಸಂಸ್ಕಾರಕಗಳು ಸಣ್ಣ ಹಿಡುವಳಿದಾರ ರೈತರಿಂದ ಕಚ್ಚಾ ವಸ್ತುಗಳನ್ನು ಪಡೆಯುತ್ತವೆ. ಕಳೆದ ೨೦ ವರ್ಷಗಳಲ್ಲಿ ಸಂಸ್ಥೆಗಳು ಹಲವಾರು ಪದರಗಳ ಮೂಲಕ ಹಾದುಹೋಗುವ ಬೆಳೆಗಳನ್ನು ಖರೀದಿಸುವ ಬದಲು ಈಗ ನೇರವಾಗಿ ರೈತರು ಅಥವಾ ಸಂಗ್ರಾಹಕರಿಂದ ಬೆಳೆಗಳನ್ನು ಖರೀದಿಸುತ್ತವೆ.

ಆಹಾರ ಪೂರೈಕೆ ಸರಪಳಿಯನ್ನು ಒಳಗೊಂಡಿರುವ ಯುರೋಪಿಯನ್ ಆರ್ಥಿಕತೆಯ ಕೃಷಿ, ಆಹಾರ ಸಂಸ್ಕರಣಾ ಕೈಗಾರಿಕೆಗಳು ಮತ್ತು ವಿತರಣಾ ಕ್ಷೇತ್ರಗಳೆಂಬ ಮೂರು ವಲಯಗಳನ್ನು ಉದ್ದೇಶಿಸಿ ಅಕ್ಟೋಬರ್ ೨೦೦೯ ರಲ್ಲಿ, ಯುರೋಪಿಯನ್ ಕಮಿಷನ್ "ಯುರೋಪ್‌ನಲ್ಲಿ ಉತ್ತಮ ಕಾರ್ಯನಿರ್ವಹಣೆಯ ಆಹಾರ ಸರಬರಾಜು ಸರಪಳಿ" ಯ ಕುರಿತು ಸಂವಹನವನ್ನು ಹೊರಡಿಸಿತು.

ಮಾರ್ಚ್ ೨೦೨೨ ರಲ್ಲಿ ಆಯೋಗವು "ಇಯು ಕೃಷಿ ಮತ್ತು ಆಹಾರ ಪೂರೈಕೆ ಸರಪಳಿಗಳು ಹೆಚ್ಚು ಸ್ಥಿತಿಸ್ಥಾಪಕ ಮತ್ತು ಸಮರ್ಥನೀಯವಾಗಲು ಅಗತ್ಯ" ಎಂದು ಗುರುತಿಸಿತು.